Глас 8-й
Песнь 1
Ирмос:Воду прошед яко сушу, и египетскаго зла избежaв, израильтянин вопияше: избaвителю и Богу нашему поим.
Святый мучениче Трифоне, моли Бога о нас.
Воистинну Божественныя на Небесех сладости наслаждаяся, яко непобедим страдалец, твоими молитвами душу мою избави от страстей смущения.
Святый мучениче Трифоне, моли Бога о нас.
Глаголы Божественными огласився, совершил еси сия, преславне, деятельно святыню возлюбив и целомудрие облобызав.
Святый мучениче Трифоне, моли Бога о нас.
Был еси истинно пастырь, пасый души твоея в мудрости помышления, души обращая заблуждающия и Богу приводя, славне.
Слава Отцу и Сыну и Святому Духу и ныне и присно и во веки веков. Аминь.
Просвещаеши мя сиянием мысленным, осияние славы рождшая отчее, Всенепорочная Отроковице, и мрак греховный разори.
Песнь 3
Ирмос:Ты еси утверждение притекающих к Тебе, Господи, Ты еси Свет омраченных, и поет Тя дух мой.
Святый мучениче Трифоне, моли Бога о нас.
Притупил еси силу гордаго, славный мучениче Христов, свыше одеявся силою.
Святый мучениче Трифоне, моли Бога о нас.
Плотию обложен, шатания безплотнаго угасил еси врага и воплощеннаго Бога Слова проповедал еси.
Святый мучениче Трифоне, моли Бога о нас.
Единым токмо пришествием твоим духи лукавствия отгоняются, Духа Святаго гоними благодатию.
Слава Отцу и Сыну и Святому Духу и ныне и присно и во веки веков. Аминь.
Имея Тя помощь, не постыждуся, Пречистая Мати Божия, имея Тя Предстательницу жизни моея, спасуся.
Седален, гл. 4
Болезньми, блаженне, наслаждался плотскими, Божественную и неболезненную пищу достойно восприял еси, венец безсмертия от Бога прием. Темже и исцелений реки источаеши любовию прибегающим, мучениче, в кров твой.
Слава Отцу и Сыну и Святому Духу и ныне и присно и во веки веков. Аминь.
Ужасно чудо зачатия, и несказанен образ Рождества, в Тебе познася, Чистая Приснодево, ужасает мой ум, и удивляет помысл. Слава Твоя, Богородице, всем простреся во спасение душ наших.
Песнь 4
Ирмос:Услышах, Господи, смотрения Твоего таинство, разумех дела Твоя, и прославих Твое Божество.
Святый мучениче Трифоне, моли Бога о нас.
Зрящих удивил еси терпения, блаженне, твердостию: муки бо претерпел еси, яко в чуждем стражда телеси, мудре Трифоне.
Святый мучениче Трифоне, моли Бога о нас.
Питался еси, блаженне, ранами болезней, бием, ныне же наслаждаешися чистее, присносущныя славы насыщаяся.
Святый мучениче Трифоне, моли Бога о нас.
Стружему телеси твоему железных ногтей остротою, вжиляшеся, чудне, твоея души крепость, Божественною благодатию.
Слава Отцу и Сыну и Святому Духу и ныне и присно и во веки веков. Аминь.
На Тя упование мое все возлагаю, Мати Дево: душу мою сохрани, яже Бога рождшая, Спаса моего.
Песнь 5
Ирмос:Утренююще, вопием Ти: Господи, спаси ны, Ты бо еси Бог наш, разве Тебе иного не вемы.
Святый мучениче Трифоне, моли Бога о нас.
Кумиры прелестныя упразднил еси, страстотерпче, токмо бо возлюби еси Христову образу покланятися.
Святый мучениче Трифоне, моли Бога о нас.
Разумев пресветлую, славне страстотерпче, благодать Бога нашего, еяже ради пострадал еси.
Святый мучениче Трифоне, моли Бога о нас.
Божественною озарився благодатию, усердно, страдальче, Христа ради пострадал еси.
Слава Отцу и Сыну и Святому Духу и ныне и присно и во веки веков. Аминь.
Неизреченно бысть зачатие Твое, и Рождество несказанно: пребыла бо еси Чистая Приснодева.
Песнь 6
Ирмос:Очисти мя, Спасе, многа бо беззакония моя, и из глубины зол возведи, молюся, к Тебе бо возопих, и услыши мя, Боже спасения моего.
Святый мучениче Трифоне, моли Бога о нас.
Изсушив мерзкия жертвы, и приношения скверная, и неистовства идольская твоими кровьми, славне, напоил еси вся церковная благородная, Трифоне, прозябения.
Святый мучениче Трифоне, моли Бога о нас.
Струпи мученичестии яко миро благоухают, кровь страдалец источает исцеления, останцы же тела души освящают верою касающихся им.
Слава Отцу и Сыну и Святому Духу и ныне и присно и во веки веков. Аминь.
Яко одушевлен кивот прияла еси Слово Безначальное, яко Святое Святилище Зиждителя вместила еси, яко Престол огнезрачен носиши Владыку, Богомати, всея твари.
Кондак, гл. 8
Троическою твердостию многобожия разрушил еси от конец, всеславне, честен во Христе быв и, победив мучители во Христе Спасителе, венец приял еси мученичества твоего и дарования Божественных исцелений, яко непобедим.
Икос
Пение ми даруй, Боже мой, воспевати и глаголати, и почитати подвиги страстотерпца Твоего и мученика, яко да благосочетанно восхвалю добляго во страдании Трифона, победителя в страстех бывша всегда, великаго во благочестии, и в лице мученик возсиявшаго: в нихже поет непрестанно Христа, со множеством ангельским премудрый, приемля свыше Божественное осияние и моля непрестанно о всех нас.
Песнь 7
Ирмос:От Иудеи дошедше, отроцы, в Вавилоне иногда верою Троическою пламень пещный попраша, поюще: отцев Боже, благословен еси.
Святый мучениче Трифоне, моли Бога о нас.
Венценосец, ликуеши с лики мученик, веселяся, прелесть бо победив словом истинным, воспеваеши, радуяся: отец наших Боже, благословен еси.
Святый мучениче Трифоне, моли Бога о нас.
Владыка всяческих Своими страданьми венчает мученика и сего водворяет в селех Небесных, зовуща и глаголюща: отец наших Боже, благословен еси.
Слава Отцу и Сыну и Святому Духу и ныне и присно и во веки веков. Аминь.
Млада носящи Младенца, прежде всех век Бога, Всенепорочная, из Тебе воплощенна, не престай молящи спасти поющия: отец наших Боже, благословен еси.
Песнь 8
Ирмос:Седмерицею пещь халдейский мучитель Богочестивым неистово разжже; силою же лучшею спасены сия видев, Творцу и Избавителю вопияше: отроцы, благословите, священницы, воспойте, людие, превозносите во вся веки.
Святый мучениче Трифоне, моли Бога о нас.
Даже до усекновения и опаления, даже до кровепролития, даже и до смертныя кончины пострадал еси, сопротивляяся противу греха, мучениче Христов, ныне же, жизнь во Христе сокровенную приемь, взываеши: священницы, благословите, людие, превозносите во вся веки.
Святый мучениче Трифоне, моли Бога о нас.
На земли подвизался еси, с нечестивыми боряся, противу лестней и богоборней лести горце нудящим; на Небесех же, Трифоне, наслаждаешися, венец нося, и со Ангелы ликуеши, поя: отроцы, благословите, священницы, воспойте, людие, превозносите Господа во веки.
Святый мучениче Трифоне, моли Бога о нас.
Мучительское изобличил еси безбожие, всемудре, и демонское богоборство угасил еси струями кровей твоих; в Троице Единаго Бога достолепне и чисте возвещая и чествуя, взывал еси: отроцы, благословите, священницы, воспойте, людие, превозносите во вся веки.
Слава Отцу и Сыну и Святому Духу и ныне и присно и во веки веков. Аминь.
Глаголом Твоим последующе, ублажаем, Пречистая, Тя, Блаженную, плотию рождшую воистинну Блаженнаго, Света живущаго незаходимаго, и Светонаставника, и Светодавца Владыку, Егоже отроцы благословят, священницы воспевают и превозносят во вся веки.
Песнь 9
Ирмос:Тя, неискусобрачную Матерь Бога Вышняго, Тя, паче ума рождшую словом воистинну Бога, вышшую Пречистых сил, немолчными славословии величаем.
Святый мучениче Трифоне, моли Бога о нас.
Паче видимых мученическое чаяние полно безсмертнаго наслаждения: видится сих надежда, полна благоухания, и радости, и светлости неизреченныя. Темже достойно ублажаются.
Святый мучениче Трифоне, моли Бога о нас.
Свет был еси вторый, к Свету первому приближився, зарею Его просвещаемь и воображаемь, Трифоне мудре, и Того подательными светлостьми сияя; тем тя вси ублажаем.
Святый мучениче Трифоне, моли Бога о нас.
Явился еси неужасен в подвизех, страстотерпче, явился еси истинно тезоименит Божественней и святей пищи, еяже ныне восприемля и ясно наслаждался, спасение чтущим тя нам испроси.
Слава Отцу и Сыну и Святому Духу и ныне и присно и во веки веков. Аминь.
Умертви мудрование, Богородительнице, плоти моея и оживи душевное умерщвление действом Истинныя Жизни, из Тебе рождшияся плотию за неизреченное благоутробие и спасение поющих Тя.
Светилен
Пищи наслаждаяся преславныя и Божественныя, Ангелом единожитель был еси, блаженне; гуси пасый в лузех, от Бога приял еси благодать исцелений, Трифоне великомучениче, исцеляти человеческия немощи и недуги.